Бурабай туристерді күзде де қызықтырмақ

ДИКТОР: Ақмола облысына келетін туристер ағыны арта түсуде. Биыл өңірге шамамен екі миллион адам келеді деп күтілуде. Дәстүрлі түрдегідей, басты тартымды орталық болып Бурабай курорттық аймағы қала бермек. Қазіргі таңда дәстүрлі туризммен қатар, демалыстың баламалы түрлеріне, атап айтқанда, белсенді демалысқа арналған жаңа орындар мен бағыттарға баса назар аударылуда. Толығырақ тілшіміз баяндайды. 

РЗК: «Қазақстанның інжу-маржаны» деп аталатын Бурабай туристерге өзінің жаңа қырларын біртіндеп ашып келеді. Абылай хан алаңы мен Жұмбақтас сияқты көпшілікке танымал орындардан бөлек, аймақта жаңа туристік нысандар бой көтеруде. Солардың бірі — «Ақбура» туристік аймағы. Мұнда келушілер таулы пейзаждар мен көлдердің сұлулығына тамсанып қана қоймай, белсенді әрі қызықты демалыс түрлерін, мысалы, велосипедпен серуендеуді де тамашалай алады.

СНХ: ҚАЛИБЕК АҚЫЛБЕКОВ, «БУРАБАЙ ДАМУ» ЖШС– ДИРЕКТОР: Қазіргі таңда біз Ақбура туристік локация, туристік аймағында орналасып тұрмыз. Ол қазіргі кезде қарқынды дамып жатыр. Туристерді қабылдауға. Стратегиялық қарасақ, біз қазір екі көлдің ортасында тұрмыз. Ол Үлкен Чебачье және Кіші Чебачье көлдерінің ортасында. Ол туристерге қолайлы. Және де өте әдемі болып келеді. Және де алақандағыдай қарасақ болады. Ол Көкше тауымыз және де Оқжетпес тауларымыз біздің алақандағыдай көрініп тұр. Осы жерге туристердің келуіне барлық мүмкіндіктері бар. 

РКС: Бурабайдағы «Ақмарал» марал шаруашылығы – туристер үшін тағы бір қызықты орын. Мұнда сіз маралдарды көріп, оларды өсіру ерекшеліктерімен таныса аласыз. Қазіргі таңда шаруашылықта 300-ден астам марал бар, ал келушілерге оларды табиғи ортасында бақылауға мүмкіндік беріледі. Көпшілік біле бермейтін тағы бір жайт: мұнда экскурсиялардан бөлек, маралдың жас мүйіздеріне негізделген сауықтыру ем-шаралары да ұсынылады.

СНХ: РАДИК АШИМОВ , «AQMARAL» ОРМАН ФЕРМАСЫНЫҢ ЖЕТЕКШІСІ: Мұнда адамдар ем алу үшін келеді, бірақ бұл жалғыз себеп емес. Кей қонақтар жай ғана демалып, таза ауамен тыныстау үшін келеді. Біздің аумақта екі, үш немесе төрт адамға арналған алты бөлмесі бар қонақ үйіміз бар. Сондай-ақ, асхана да қарастырылған; біз ұсынатын қызмет пакеттеріне тұру және тамақтану кіреді. Ең бастысы, біз бұғы мүйіздерін қолдану арқылы жасалатын емдік шаралар қызметін ұсынамыз. Келген бойда қонақтар дәрігердің кеңесінен өтеді: дәрігер оларға не қажет екенін анықтап, қарсы көрсетілімдердің бар-жоғын тексереді және басқа да қажетті мәселелерді сол жерде талқылайды.

РКС: Ферманың инфрақұрылымы бүгінде де кеңейе түсуде. Мұнда кофехана ашылды, сондай-ақ ферманың өз өнімдері сатылатын дүкен де бар. Бұл туристерге экскурсиядан кейін аумақта көбірек уақыт өткізіп, демалуға тағы бір мүмкіндік береді.

СНХ: АНАР ЖҮСІПОВА, ТУРИСТ: Біз Бурабайға жылдың төрт мезгілінде келіп тұрамыз. Бізге марал шаруашылығы қатты ұнайды. Мұнда бірінші рет келуіміз; бұл жер туралы көп естіп, өз көзімізбен көруді жөн көрдік. Мүмкіндік болған сайын, сіздердің өңірлеріңізге арнайы келіп тұруға тырысамыз.

СНХ: АЛМАТ АҒАЙСИН – ТУРИСТ: Мүмкін, кейінірек біз ем қабылдап, олардың шипажайына барармыз. Мұнда өте керемет, ауа райы да жақсы. Біз Қостанай қаласынан келдік.

РКС: Бөлектау тауы — аймақтағы ең жиі баратын табиғи көрікті жерлердің бірі. Ол жерден Бурабайдың көлдері, ормандары мен жартасты түзілімдеріне ашылатын панорамалық көріністі тамашалауға болады. Жақында шыңға апаратын жол ретке келтіріліп, жаңа баспалдақтар мен бақылау алаңының салынуы арқылы туристік инфрақұрылым жақсартылды. Бұл өзгерістер келушілерге аялдап, айналаны тамашалауға және суретке түсіруге мүмкіндік береді. Сонымен қатар, бұл шараның экологиялық маңызы да бар: ағаш жолдар келушілер ағынын арнайы белгіленген бағытқа бағыттап, топырақтың эрозияға ұшырауын және өсімдік жамылғысының зақымдануын азайтады.

СНХ: ҚАЛИБЕК АҚЫЛБЕКОВ – «БУРАБАЙ ДАМУ» ЖШС ДИРЕКТОРЫ: Соның бәрі осы туристердің ыңғайлығы үшін жасалып жатыр. Және туристік потокты бір қалыпта ұстау үшін. Оның бәрі сол біздің табиғатымыздың айлау аймағында және таза ауасын сақтау аймағында жасалып жатыр. Адамдардың аяғы қазір өзіңіз қарасаңыздар, осы абаттандыру жұмыстарының арқасында адамның аяғы сол жерге тимей, ағаш бөліктерімен жерлеп береді. Қазіргі таңда бұл Бөлектау осы туристік аймағы туристерге өте қолайлы, өте ыңғайлы және де өте тартымды. Осы жерде міне біздің Жұмбақтас тасымыз және Оқжетпес тастарымыз көрініп жатыр. Және де көрме орны осы талдай аймақта орналасып, барлық Бурабай көлі сол алақандардай көрініп тұрады.

СНХ: БАҚЫТГҮЛ ЖОЛДАСОВА – ГИД, ЭКСКУРСОВОД: Демалушылар көп және біздің ең әдемі курорттық орындарымызға барғысы келетіндер күн сайын артып келеді. Біз әрдайым қонақтарымызды қарсы алып, оларға өз өлкемізді, біздің тауларымызды, жартастарымызды, қызықты аңыздарымызды көрсетуге және жақсы әсер беруге дайынбыз.

РКС: Соңғы жеті жыл ішінде Бурабай ауданындағы туризм саласы айтарлықтай өзгерістерге ұшырады. Курорттық аймақ дамып, жаңа нысандар мен бағыттар ашылуда. Көл жағасындағы дәстүрлі демалыс түрлері қазіргі таңда экотуризм және сауықтыру бағытындағы қызметтермен толықтырылуда. Мұндағы мақсат – тек келушілер санын арттыру ғана емес, сонымен қатар осы табиғи аймақтың ерекше келбетін сақтай отырып, туристік ағынды тиімді басқару болып табылады.

ГӘККУ АСЫЛБЕКҚЫЗЫ, ВЕРОНИКА ЦВЕТКОВА, БАУЫРЖАН СМАҒҰЛОВ, АЛМАС СӘДУАҚАСОВ, КӨКШЕ АҚПАРАТ.