Көкшетаулық зауыт жылына 5 мың тонна майлау материалын өндіреді
ДИКТОР: Жыл басынан бері Қазақстанның химия өнеркәсібінің негізгі капиталына 400 миллиард теңгеге жуық инвестиция салынды. Отандық өндірушілер ішкі нарықта нық орын алған. Көкшетауда майлау материалдарын шығаратын зауыт 15 жылға жуық уақыт бойы жұмыс істеп келеді. Кәсіпорын өнеркәсіп, ауыл шаруашылығы, өндіру және өңдеу салаларына, сондай-ақ тұтынушыларға арналған майлар мен майлағыштардың түр-түрін жасайды. Тілші баяндайды.
РКС: Майлағыш материалдар машиналар мен механизмдердің қозғалмалы бөлшектері арасындағы үйкелісті азайту үшін қолданылады. Сапалы майлағыш автомобильдердің, ауыл шаруашылығы техникасының, теміржол вагондарының, өнеркәсіптік станоктар мен басқа да жабдықтардың қызмет ету мерзімін ұзартады. Көкшетау зауыты айына 400 тонна өнім шығарады. Бұл өнім құрылымдарды жоғары жүктемелер мен жоғары температура жағдайында тозудан қорғайды.
СНХ: АЛЕКСАНДР АНДРЕЕВ, ЗАУЫТТЫҢ ӨНДІРІС БАСТЫҒЫ: Біз пластикалық майлар өндіретін алты желіні, сондай-ақ арнайы майлар атап айтқанда, трансмиссиялық, гидравликалық және редукторлық майлар шығаратын жеке желіні іске қосамыз. Біздің жабдықтарымыз бір мезгілде бес түрлі май өнімін кальций негізіндегі майлардан бастап, литий-кальций, литий және күрделі құрамды майларға дейін өндіруге мүмкіндік береді. Өндірістік желіміз жартылай автоматтандырылған, ал құю процесінде салмаққа негізделген мөлшерлеу жүйесі қолданылады.
РКС: Кәсіпорын заманауи әрі сертификатталған зерттеу және әзірлеу зертханасын пайдаланады. Осының арқасында компания стандартты өнімдер желісінен бөлек, тұтынушылардың нақты талаптарына сай келетін импорттық өнімге балама ретінде майлау материалдарын шығара алады.
СНХ: ИВАН ПЕТРОЖИЦКИЙ, ЗЕРТХАНА МЕҢГЕРУШІСІ: Өнімнің сынақ партиясы тәжірибелік жабдықта дайындалады. Ол талдаудан, атап айтқанда, сапа көрсеткіштерін тексеруден өтеді. Содан кейін біздің реакторларда толық ауқымды өндірісті бастау туралы шешім қабылданады. Біз майлау материалдарын араластырудың бастапқы кезеңдерінен бастап, материалды жөнелтуге түпкілікті рұқсат беруге дейінгі бүкіл процесті қадағалаймыз. Біздің зертхана өндірістің әр кезеңінде тәулік бойы бақылау жүргізеді.
РКС. Бүгінде зауыт ірі отандық өңдеу кәсіпорындарымен тікелей ынтымақтастық орнатқан. Оның өнімдері Қазақстанның барлық өңірінде ғана емес, сонымен қатар шетелдегі 11 елде де сатылады. Биыл Көкшетауда шығарылған майлау материалдары өңірдегі үздік өнеркәсіптік өнімдердің бірі ретінде танылды. Компания «Қазақстанның үздік тауары – 2026» ұлттық байқауында елдің үздік өндірушісі атағы үшін бақ сынауды жоспарлап отыр.
ГӘККУ АСЫЛБЕКҚЫЗЫ, ЭЛЬМИРА ОСПАНОВА, ПАВЕЛ СОЛОВЬЕВ, ТЕМІРЛАН СӘБИТОВ, КӨКШЕ АҚПАРАТ