Щучинскідегі жарылысқа қатысты қылмыстық іс қозғалды

ДИКТОР: Щучинск қаласындағы дәмханалардың бірінде болған жарылыстың салдарынан 7 адам қаза тапты. Қайғылы жағдай құрбандарының арасында бір кәмелетке толмаған жасөспірім бар. Сондай-ақ 28 адам түрлі жарақат алып, 13-і ауруханаға жатқызылды.

РКС: Оқиға кеше кешкі сағат 10 шамасында 5 қабатты тұрғын үйге жапсарлас орналасқан дәмханалардың бірінде болған.

СНХ: ЕРЛАН ТӨРЕГЕЛДИЕВ, ҚР ТӨТЕНШЕ ЖАҒДАЙЛАР МИНИСТРЛІГІ ӨРТКЕ ҚАРСЫ ҚЫЗМЕТ КОМИТЕТІНІҢ ТӨРАҒАСЫ: Оқиға орнына өрт сөндіру бөлімшесі небәрі 5 минут ішінде жетті. Құтқарушылар келген сәтте дәмхана ғимараты толықтай ашық жалынға оранып, ішкі және сыртқы қабырғалары опырылғаны анықталды. Жедел әрі үйлесімді әрекеттің нәтижесінде 10 адам қауіпсіз жерге шығарылды. Сондай-ақ әрқайсысының көлемі 50 литр болатын 5 газ баллоны дер кезінде сыртқа шығарылды. Бұл нысанда қос жарылыстың болуының алдын алды.

СНХ: НАРИМАН СЫЗДЫҚОВ, ОБЛЫСТЫҚ ДЕНСАУЛЫҚ САҚТАУ БАСҚАРМАСЫНЫҢ БАСШЫСЫ: Оқиға орнында 5 адам қаза тапты, тағы 2 адам жансақтау бөлімінде көз жұмды. Қазір Бурабай аудандық ауруханасының жансақтау бөлімінде жағдайы ауыр және аса ауыр халде 4 науқас жатыр, 3 науқас травматология бөлімінде. 8 адам амбулаторлық ем қабылдауда. 6 науқас шұғыл түрде Көкшетау қаласындағы көпсалалы облыстық ауруханаға жеткізілді.

РКС: Қазір зардап шеккендерге барлық қажетті медициналық және психологиялық көмек көрсетілуде. Бурабай аудандық әкімдігі марқұмдардың отбасына 2 миллион теңге көлемінде біржолғы материалдық көмек береді. Ал зардап шеккен азаматтарға 1 миллион теңгеден қаржылай қолдау көрсетіледі. Сондай-ақ жерлеу рәсімдерін ұйымдастыруға байланысты барлық шығынды да өз мойнына алып отыр. Аталған дерек бойынша қылмыстық іс қозғалып, жедел штаб құрылды. Тергеу амалдары жалғасып жатыр.

ЖАНАР МҰҚЫШЕВА, ЖАМБЫЛ БАЛТАЕВ, КӨКШЕ АҚПАРАТ