ДИКТОР: Жарқайың ауданы жан-жақты қарқынды дамып жатқан өңірдің бірі. Соңғы жылдары ауданда мәдениет, медицина, білім және спорт саласында айтарлықтай оң өзгерістер байқалады. Мәселен «Мерген» спорт клубының түлегі Әсем Жанәділова биыл Дубайда өткен әлемдік гран-приде пара жеңіл атлетикадан 1-ші орын алды. Бүгінде ел намысын қорғап жүрген спортшылардың жаттығу барысымен тілшіміз таныстырсын.
РКС: Данияр Бектемісов «Мерген» спорт клубы ашылғалы мүмкіндігі шектеулі спортшыларды жаттықтырып келеді. Бүгінде 9 спортшы бұл залда денесін шынықтыруда. Кезінде қысқа қашықтыққа жүгіру спортынан талай жүлдеге ие болып спорт шеберлігіне үміткер атанған жаттықтырушының, бүгін өз жеңімпаздары бар.
СНХ: ДАНИЯР БЕКТЕМІСОВ, «МЕРГЕН» СПОРТ КЛУБЫНЫҢ ЖАТТЫҚТЫРУШЫСЫ: Жаттықтырушы болғалы 3 спорт шеберін және 5 спорт шеберіне үміткер дайындадым. Менің тәрбиеленуші спортшыларымның арасында Қазақстан, облыс, чемпиондары және Әлем кубогы жүлдегерлері бар. 2022 жылы спортшы Әсем Жанәділова Мароккода өткен әлемдік гран-при сериясында күміс және қола медаль жеңіп алды. 2025 жылы Дубай қаласында өткен гран-при жарысында 1-орынға табан тіреді.
СНХ: ӘДІЛ НҰРБЕКОВ, СПОРТШЫ: Жалпылама алғанда 10 жылдық тарихта 19 спортшымыз Ақмола облысының намысын 9 спорттың 9 түрінен қорғаған еді. Ол тек жеңіл атлетикадан емес, пара үстел тенисі, жүзу тоғыз құмалақтан және де пневматикалық ату сияқты спорт түрлерінен біздің спортшыларымыз Қазақстан Республикасының деңгейінде жүлделерге ие болған.
РКС: Биыл Облыс әкімі Марат Ахметжанов клубтың әлеуетін жақсарту мақсатында облыстық бюджеттен 5 миллион теңге қаражат бөлді. Клуб жаңа спорттық жабдықтармен жаңартылды. Сондай-ақ, үстел тенисін, жүгіру жолын және жаттығуға қажетті құралды сатып алды. Айта кетейік, көрші ауылдан келетін спортшыларға да бар жағдай жасалған.
СНХ: ЕКАТЕРИНА РЕВА, СПОРТШЫ: Мен 2021 жылдан бері спортпен шұғылданып келемін. 4 жылдың ішінде жеңіл атлетикадан ішінде жақсы нәтижелерге қол жеткіздім. Ядро лақтыру бойынша спорт шеберлігінен үміткермін. Гостелла ауылында тұрамын. Жаттығуға инвотаксимен барып келемін. Бізді алып кетеді, апарып, қайта жеткізеді. Жаттығу жасау үшін барлық жағдай жасалған.
РКС: Спорт –ұлт саулығы. Параспортшылар арасында Қазақстанның Ұлттық құрама командасында облыстың 500-ден астам спортшы бар. Ақмола облысының пара спортшылары жыл басынан бері республикалық және халықаралық жарыстардан 2 мыңға жуық медаль еншіледі. Өңір мақтанышына айналған спортшылар болашақта әлемдік аренада елдің туын көкке көтереді деп сенеміз.
РИЗАГҮЛ ШӘМЕНОВА, ЖҮРСІН ӨМІРЗАҚ, ЖАМБЫЛ БАЛТАЕВ, КӨКШЕ АҚПАРАТ.