ДИКТОР: Аграрлық ғылымның озық жетістіктері-тікелей егіс алаңында. Биыл ауыл шаруашылығының тиімділігін арттыруға бағытталған маңызды бастама қолға алынды. Тілшіміз Сәния Есімсейітова жалғастырады.
РКС: Александр Бараев атындағы ғылыми орталығы биыл арнайы бюджеттік бағдарлама аясында ауыл шаруашылығы кәсіпорындарда ғылыми-инновациялық тәжірибені енгізе бастады. Жыл бойы ғалымдар түрлі топырақ-климаттық аймақтарда орналасқан алты шаруашылықтағы көктемгі егін егу және күзгі жиын-терім жұмыстарын сүйемелдеп отырды. Үш мың гектардан астам алқапта ғылым мен өндірістің озық жетістіктері қолданылды. Бұл жұмыстар Ақмола облысы әкімшілігінің қолдауымен 019 бюджеттік бағдарлама аясында жүзеге асырылды.
СНХ: БАХТИЯР ЖАНЗАҚОВ, А.И.БАРАЕВ АТЫНДАҒЫ ҒЫЛЫМИ-ЗЕРТТЕУ ОРТАЛЫҒЫНЫҢ ЗЕРТХАНА МЕҢГЕРУШІСІ: Ең алдымен біз топырақ-климаттық жағдайларға бағалау жүргіздік: топырақ құнарлылығын анықтап, алқаптардың агрохимиялық зерттеулерін жасадық. Сонымен қатар тұқым өнімінің фитосанитарлық сапасын, оның себуге жарамдылығын тексердік. Шаруашылықтардың техникалық әлеуетін, қолданатын технологияларын да зерттедік. Біздің мақсат – шаруашылықтың технологиясын түбегейлі өзгерту емес, керісінше жағдайға бейімделген максималды өнім алуға көмектесетін тиімді элементтерді енгізу. Жасыратыны жоқ, биылғы жыл қолайлы болды. Сондықтан біз енгізген технологиялар мен қосымша шаралар өз нәтижесін көрсетті. Мәселен, барлық шаруашылықтарда өнімділік бақылау алқаптарымен салыстырғанда 10–33%-ға артты. Бұған қоса, өнім сапасы да 2–3%-ға жақсарды. Яғни дәннің классы 3-сыныптан жоғары - high-pro деңгейіне көтерілді
РКС: «Ақтық» агрофирмасында өндірістік тәжірибелер 600 гектардан астам алқапта жүргізілді. Зерттеулер барысында әртүрлі мөлшерде тыңайтқыштар қолданылып, өсімдіктердің қоректік элементтерге қамтамасыз етілуінің әртүрлі жағдайлары қалыптастырылды. Сонымен қатар, бірнеше Ресей және Қазақстан шығу тегі бар бидай сорттары егілді. Дақылдардың өсу және дамуы кезеңінде өсімдіктерді қорғаудың әртүрлі комбинациялары қолданылды. Қосымша ретінде биоұрықтандырғыштар, өсімдік өсуін ынталандыратын препараттар және тұқым өңдеуші құралдар сынақтан өткізілді.
СНХ: БЕРІК БАЗАРБАЕВ, А.И.БАРАЕВ АТЫНДАҒЫ ҒЫЛЫМИ-ЗЕРТТЕУ ОРТАЛЫҒЫНЫҢ АҒА ҒЫЛЫМИ ҚЫЗМЕТКЕРІ: Егіс науқаны барысында топырақтың агрохимиялық көрсеткіштері анықталды, тұқымға фитосанитарлық баға берілді, тұқымды дәрілеу, тыңайтқыш енгізу және өсімдік даму кезеңінде қоршаған орта жағдайларынан туындайтын зиянды факторларға қарсы іс-шаралар атқарылды. Ғылыми зерттеу жұмыстарының нәтижесінде тәжірибе алқаптарындағы астық өнімі бақылау нұсқасымен салыстырғанда 33%-ға жоғары болды.
РКС: Агротехникалық шаралардың тиімділігін бақылау үшін дрондар мен ғарыштық суреттер қолданылды. Бұл әдіс егістіктің жағдайын жылдам әрі нақты бағалап, дақылдардың өсуі мен қоректенуін қадағалауға мүмкіндік берді.
СӘНИЯ ЕСІМСЕЙІТОВА, БЕКЖАН ТӨЛЕБЕК, КӨКШЕ АҚПАРАТ