ДИКТОР: Қазақстан инвестициялық тартымдылығын арттыра отырып, ашық әрі тұрақты экономикалық жүйе құруда. Бұл бағытта Елорда маңындағы елді мекендердің инфрақұрылымын дамытуға ерекше назар аударылуда. Осы мақсатта Аршалы ауданында республикалық маңызы бар «Aqmola» индустриялық аймағы құрылады.
РКС: Президенттің тапсырмасы бойынша елімізде отандық тауар өндірушілерді қолдау және өңдеуші өнеркәсіпті дамыту бағытында кешенді жұмыстар жүргізілуде. Экономикаға жеке инвестициялар тартылып, іскерлік белсенділікті арттыруға қолайлы жағдайлар жасалуда. «AQMOLA» индустриялық аймағы – мемлекеттің индустрияландыру стратегиясының маңызды бөлшегі. Өңірдің егістік алқаптарында «REMSINTEZ» ауыл шаруашылығы техникасын өндіретін зауыттың өнімдері қолданысқа енгізілді. Алдағы уақытта өнім түрлерін кеңейту жоспарланып отыр. Бұл импорттық баламалардан шамамен екі есе арзан болмақ.
СНХ: АҚАН КУКАЕВ, ЗАУЫТ ДИРЕКТОРЫ: Біз ауыл шаруашылығы машиналары мен агрегаттарын өндіретін зауыт салуды жоспарлап отырмыз. Кәсіпорынның жалпы аумағы 10 мың шаршы метрден асады. Жобаның инвестициялық құны – 7 миллиард теңге. 110-нан астам жаңа жұмыс орнын ашу көзделуде. Номиналды қуатқа шыққан кезде бюджетке жыл сайынғы салықтық аударымдар көлемі 500 миллион теңгені құрайтын болады. Біз әрқашан фермерлермен тығыз байланыста жұмыс істейміз және олардың сұраныстарына жедел жауап беруге дайынбыз.
РКС: Соңғы жылдары облыстың өңдеу өнеркәсібі айтарлықтай жетістіктерге қол жеткізді. Әсіресе, бірқатар негізгі өндірістік бағыт бойынша еліміз жетекші орындарда. Бұл жетістіктер өңірдің индустриялық әлеуетін арттыруға, жаңа жұмыс орындарын ашуға және экономиканың тұрақты өсуіне ықпал етуде.
ИНФОГРАФИКА МӘТІНІ: Ақмола облысы еліміз бойынша өндірілетін теміржол подшипниктерінің жалпы көлемін толық қамтамасыз етіп отыр. Арнайы мақсаттағы автомобильдер өндірісінің 84 проценті, ал астық жинайтын комбайндардың 65 проценті де облыстың үлесінде. Сондай-ақ, аймақ тракторлар, алтын құрамдас кен және тазартылмаған күнбағыс майын өндіруде де айтарлықтай үлес қосуда.
ИНФОГРАФИКА: Ақмола облысының өндірістегі үлесі:
• теміржол подшипниктері – 100 %;
• арнайы мақсаттағы автомобильдер – 84 %;
• астық жинайтын комбайндар – 65 %;
• тракторлар – 40 %;
• алтын құрамдас кен – 50,8 %;
• тазартылмаған күнбағыс майы – 11,8%
РКС: AQMOLA» индустриялық аймағында өндірістік кәсіпорындармен қатар жүк тасымалдау қызметін ұйымдастыруға да басымдық беріледі.
ГЕО: АРШАЛЫ
СНХ: МАРАТ ЖҰМАН, КОМПАНИЯЛАР ТОБЫНЫҢ НЕГІЗІН ҚАЛАУШЫ: Бірінші кезекте біз «А» класты қоймаларды салуды жоспарлап отырмыз. Қазір электрондық сауда қарқынды дамып келеді. Сонымен қатар, өзіміздің ауыл шаруашылығы өнімдерімізді Қытай, Орталық Азия және Еуропаға экспорттауды көздеп отырмыз. Шамамен 30 мемлекетте жұмыс істейміз және жүк тасымалдаудың барлық түрін жүзеге асырамыз. Бүгінде Қазақстанда 6 халықаралық логистикалық хабымыз бен терминалымыз бар. Болашақта оларды Астана маңында, Ақмола индустриалды аймағында салуды жоспарлап отырмыз, себебі бұл – Орталық Қазақстан. Біздің мақсатымыз – осында ірі хаб құру, ол отандық өнім өндірушілердің экспорт/импорт жүк тасымалын қамтамасыз етеді.
РКС: Жыл басынан бері жергілікті кәсіпорындар тауарлық өнім өндірісін шамамен 1,5 триллион теңгеге жеткізді. Өңір өнеркәсібіндегі өңдеу секторының үлесі шамамен 81 процентке жетті. Бұдан бөлек, қазір аймақта 4 миллиард АҚШ долларынан астам инвестициялық портфель қалыптастырылды. Жобаларды жүзеге асыру нәтижесінде шамамен 10 мың жұмыс орны ашылмақ.
СӘНИЯ ЕСІМСЕЙІТОВА, ЭЛЬМИРА ОСПАНОВА, ПАВЕЛ СОЛОВЬЕВ, КӨКШЕ АҚПАРАТ