ДИКТОР: Қызмет сапасын арттырып, халыққа қолайлы жағдай жасау – сот жүйесінің басты міндеттерінің бірі. Осы бағытта Конституция күні қарсаңында Көкшетауда мамандандырылған ауданаралық соттың жаңа фронт-кеңсесі ашылды. Салтанатты рәсімге Ақмола облысының әкімі Марат Ахметжанов қатысты. Тілшіміз жалғастырады.

РКС: Шара барысында аймақ басшысы Марат Ахметжанов жиналған қауымды алдағы Конституция күнімен құттықтап, бұл бастаманың сот жүйесін дамытуға және азаматтар үшін қолжетімді, ыңғайлы әрі әділ сот төрелігін қамтамасыз етуге елеулі үлес қосатынын атап өтті.

СНХ: МАРАТ АХМЕТЖАНОВ, АҚМОЛА ОБЛЫСЫНЫҢ ӘКІМІ: Бұл фронт-офис Президент бастама жасаған «Халық үніне құлақ асатын мемлекет» тұжырымдамасына толық сай келіп отыр. Жаңа ғимаратта сот процесін өткізуге арналған заманауи талаптарға сай барлық жағдай жасалған. Мұнда қылмыстық, азаматтық және әкімшілік құқық бұзушылық істерін қарайтын мамандандырылған судьялар жұмыс істейді. Ғимарат жобасында қазылар алқасына кандидаттарды қабылдауға қолайлы жағдай жасауға баса назар аударылғанын ерекше атап өтуге болады.

РКС: Жаңа фронт-кеңседе келушілерге кеңес беру, талап-арыз тапсыру, құжаттарды рәсімдеу сияқты қызметтер қарастырылған. Ақпараттық орталықта мамандар әрбір азаматқа сотқа қатысты барлық қажетті түсініктемелер мен көмек көрсетеді. Сондай-ақ, ювеналды және отбасылық сот жұмыс істейді. Азаматтар психолог, медиатор және адвокаттың қызметтеріне тегін жүгіне алады.

СНХ: ДАНИЯР САПАРБЕКҰЛЫ, АҚМОЛА ОБЛЫСЫ БОЙЫНША СОТ ӘКІМШІЛІГІ ДЕПАРТАМЕНТІНІҢ БАСШЫСЫ: 2024 жылдан бастап ҚР мемлекеттің басшысының шешімімен сот алқа билердің қарайтын істердің саны категориясы 32-ден 45-ке дейін өсті. Сондықтан әрбір сот процесіне қылмыстық іске Ақмола облысы өңірінде 150-200 дейін адам шақырамыз. Соның ішінде осы залда іріктеу жұмыстарын жүргізіп, сот процесін жүргіземіз. Алқа билермен қатар ювеналды соттарды отбасылық болып қайта құрылды. Оның да қарайтын істердің құрамы кеңейтілді. Сондықтан да бұл жерде ювеналды отбасы соты орналасады. Отбасылық сот балалармен де жұмыс істейді.

РКС: Шара соңында сот жүйесінде адал қызмет етіп, әділдік пен заң үстемдігін қамтамасыз етуге сүбелі үлес қосқан, сондай-ақ судьялар қауымдастығы аясында қоғамдық белсенділік танытқан бір топ азамат арнайы марапаттарға ие болды.

ЖАНАР МҰҚЫШЕВА, МЕДЕТ ҚАЙЫРКЕНОВ, КӨКШЕ АҚПАРАТ