ДИКТОР: Жергілікті кәсіподақтар – қызметкерлерді біріктіретін ұйым ғана емес, сондай-ақ, азаматтық қоғамның маңызды бөлігі. Қазір өңірде 15 салалық және жергілікті кәсіподақ ұйымы жұмыс істейді. Оған 75 мыңнан астам адам мүше. Кәсіподақтың негізгі міндеті – еңбек құқықтарын қорғау, құқықтық мәдениетті дамыту және орнықты әлеуметтік әріптестікті қалыптастыру.
РКС: Әлеуметтік әріптестік - кәсіподақтың әлеуметтік-еңбек қатынастарын реттеудегі басты құралы. Осыған сәйкес, облыстық келісім-шартқа қызметкерлердің жағдайды жақсартуға бағытталған 11 ұсыныс енгізілді. Олардың қатарында жалақыны индексациялау, еңбекақыны кемінде 30 пайызға арттыру, техникалық инспектор қызметін атқарғаны үшін қосымша ақы төлеу, техникалық қызметкерлерге еңбек демалысына шығу кезінде сауықтыруға арналған жәрдемақы беру және басқа да шаралар бар, – дейді мамандар.
СНХ: ГҮЛАЙЫМ ӘБДІРАХМАНОВА, ОБЛЫСТЫҚ КӘСІПОДАҚТАР ОРТАЛЫҒЫ ТӨРАҒАСЫНЫҢ ОРЫНБАСАРЫ: Облыстық білім басқармасы мен кәсіподақ арасында салалық келісімге қол қойылып, техникалық персоналға жыл сайынғы еңбек демалысына шығу кезінде сауықтыруға арналған жәрдемақы төлеу туралы тармақ енгізілді. Сондай-ақ, кәсіподақ қызметі еңбек қауіпсіздігін қамтамасыз етуге айрықша назар аударады. Осы мақсатта 2024–2026 жылдарға арналған «Қауіпсіз еңбек» бағдарламасы әзірленіп, бекітілген. Облыс кәсіпорындарында кәсіподақ тарапынан 900-ден астам өндірістік кеңес құрылып, 1 мыңнан аса техникалық инспектор қоғамдық бақылауды жүзеге асыруда».
РКС: Кәсіподақтар орталығының жанында заң клиникасының филиалы жұмыс істейді. Мұнда семинарлар өткізіліп, кеңес беру және еңбек дауларын шешуге жәрдем көрсету қызметтері ұйымдастырылады. Тек соңғы бір жылдың ішінде 80-нен арыз-шағым қабылданып, ондаған маманға құқықтық қолдау көрсетілді.
СНХ: АЛМАТ БЕКТҰРҒАН, КӘСІПОДАҚ ҰЙЫМЫНЫҢ МҮШЕСІ: Кәсіподақ комитетінің болуы – әр қызметкер үшін үлкен қолдау. Еңбек шартына сәйкес, бізге әлеуметтік пакеттер қарастырылған. Мысалы, тіс протездеу, әлеуметтік немесе отбасылық жағдайларға байланысты көмек көрсету сынды қолдаулар кәсіподақ тарапынан жиі көрсетіліп тұрады.
РКС: Биыл Жұмысшы мамандықтары жылы болып жарияланды. Бұл кәсіподақтар үшін нақты нәтижеге бағытталған маңызды бағдар. Құқықтық мәдениетті арттыру, мамандардың құқықтарын қорғау және әлеуметтік бірлікті нығайту. Өйткені тек адам еңбегіне сүйеніп қана тұрақты болашақ құруға болады, – дейді еңбек ұжымы өкілдері.
СӘНИЯ ЕСІМСЕЙІТОВА, ЗАРИНА САПАРҒАЛИЕВА, ПАВЕЛ СОЛОВЬЕВ, ЖАМБЫЛ БАЛТАЕВ, КӨКШЕ АҚПАРАТ