ДИКТОР: Биыл елордада тағы әлемдік және дәстүрлі діндер көшбасшыларының съезі өтеді. Түрлі конфессия өкілдері қыркүйектің 17-сі мен 18-де Астанада сегізінші рет бас қоспақ. Іс-шара Мемлекет басшысы Қасым-Жомарт Тоқаевтың төрағалығымен өтеді. Форумға 60-қа жуық елден делегациялар қатысады деген болжам бар.
РКС: «Діндер диалогы – болашақ үшін үйлесім». Биылғы съездің тақырыбы осындай. Сарапшылар мұндай форумды өткізу – Қазақстан саясатының маңызды бөлігі екенін айтуда. Өйткені, аталған шара халықаралық аренада және ел ішінде диалог пен ынтымақтастықты нығайтады.
СНХ: ҒАЛЫМТАЙ ТӨЛЕПБЕРГЕН, Ш. УӘЛИХАНОВ АТЫНДАҒЫ КӨКШЕТАУ УНИВЕРСИТЕТІНІҢ ЛЕКТОРЫ: Қазақстан Тәуелсіздікке аяқ басқан кезде көптеген шетелдік сарапшылар айтқан еді бұл жаңағы оқ-дәрі салынған бөшке, өйткені мында өзге ұлт өкілдері көп, сонымен қатар әртүрлі діндегілер көп деп. Енді осы әртүрлі діңдегілерді ымыраластыратын, бір ортаға жинайтын, бір шаңырақтың астына бір үйдің баласындай қылатын іс-шараның бірі, соның бір механизмі – осы 2003 жылдан бері біздің елімізде өтіп келе жатқан Дүниежүзілік дәстүрлі діни өкілдерінің съездері болып табылады.
РКС:Алғашқы съезд осыдан 20 жылдан астам бұрын елордада өтті. Содан бері форумда рухани көшбасшылар халықаралық қауіпсіздік, терроризм мен экстремизмге қарсы күрес, жаһанданудың сын-қатерлері мен экологияны қорғау мәселелерін талқылап келеді. Соңғы рет конфессия өкілдері Астанаға 2022 жылы жиналды. Ол кездегі басты тақырып – пандемия еді. Съезд барысында бейбітшілікті сақтау, диалогты нығайту және өзара құрмет пен ынтымақтастық мәдениетін дамытуға бағытталған ұсыныстар айтылады.
СНХ: БОЛАТ ҚАСЕНОВ, ОБЛЫСТЫҚ ДІН ІСТЕРІ БАСҚАРМАСЫНЫҢ БАСШЫСЫ: Ежелгі тарихтан бәрімізге белгілі – діни көшбасшыларының еліміздің, барлық әлем азаматтарын бірлікке, бейбітшілікке, ынтымақтастыққа шақыратын болады. Ірі-ірі көшбасшылар келгендіктен елімізге, әлемдік болып жатқан жағдайларға қатысты әртүрлі талқылаулар өтеді деп ойлаймыз. Бұл съездің біздің еліміз үшін, жеріміз үшін мақсаты – ол біздің еліміздің құңдылығымыз, елімізде ауыз біршілігіміздңі көрінісі. Яғни, діңаралық, конфессияаралық қатынастар елімізде жан-жақты бірлікке, бейбітшілікке тұрып жатқандарымыздың белгісінің бірі болып табылады.
РКС:Халықаралық конфессия өкілдері Қазақстанда өткізілетін съездің маңыздылығына сан мәрте тоқталды. Себебі дәл осы Астанада рухани дипломатия мен бірлік мәселесі кеңінен қозғалады. Айта кетейік, биыл сондай-ақ Діни жас көшбасшылардың ІІ форумын өткізу де жоспарланып отыр. Бұдан бөлек, сарапшылар діни нысандарды қорғау мәселесін де талқылайды.
НҰРСӘУЛЕ МҰРАТ, ЭЛЬМИРА ОСПАНОВА, МЕДЕТ ҚАЙЫРКЕНОВ, КӨКШЕ АҚПАРАТ