ДИКТОР: Облыста "ӨРТ-2025" республикалық ауқымды командалық-штабтық оқу-жаттығуы басталды. Екі күн бойы құтқарушылар мен азаматтық қорғау қызметтері шындыққа барынша жақын жағдайларда табиғи өрттердің алдын алу және жою дағдыларын пысықтады.
РКС: Бурабай ауданы Шиелі ауылының маңында шатырлы лагерь ашылып, жедел штаб жұмысын бастады. Орман өрттерін сөндіру, халықты эвакуациялау, жоғалған адамдарды іздеу бойынша іс-шаралар пысықталды. Жаттығуға 800-ге жуық адам, 300-ден астам техника және екі тікұшақ қатысты. Іс-шараға Төтенше жағдайлар департаменті, Мәлік Ғабдуллин атындағы азаматтық қорғау академиясы, аумақтық орман шаруашылықтары және жергілікті атқарушы органдардың өкілдері жұмылдырылды.
СНХ: БАТЫРЖАН ӘБІЛПЕЙІСОВ - ОБЛЫСТЫҚ ТАБИҒИ РЕСУРСТАР ЖӘНЕ ТАБИҒАТТЫ ПАЙДАЛАНУДЫ РЕТТЕУ БАСҚАРМАСЫ БАСШЫСЫНЫҢ ОРЫНБАСАРЫ: Біз осы оқу-жаттығуларға қатысамыз. Біздің мемлекеттік мекеме, 2 орман шаруашылығы. 5 бірлік техника ұсынылды. Бұл екі өрт сөндіру машинасы, екі трактор, мотоциклдер және шағын ағаш патрульдік кешені. Бүгін барлық қызметтердің іс-әрекеттері, орман және дала өрттерін сөндіру, уақытылы анықтау және сөндіру бойынша өзара іс-қимыл өңделетін болады.
РКС: Айта кетейік, бүгінгі таңда облыс аумағында 8 өрт тіркелген. Орман өрттерінің ауданы 2 гектардан асты. Сонымен қатар, 180-ге жуық дала өрті тіркелген. Олардың ауданы шамамен 100 гектарды құрады. Мұндай жаттығулар халықтың қауіпсіздігі мен қоршаған ортаны қорғаудың негізі болып табылады. Олар өртке қарсы жауап беру жүйесіндегі әлсіз жерлерді анықтауға мүмкіндік береді, сонымен қатар барлық құрылымдар арасындағы өзара әрекеттесуді күшейтеді.
СНХ: РЕНАТ ВАЛИШАНОВ - ОБЛЫСТЫҚ ТЖ ДЕПАРТАМЕНТІ БАСТЫҒЫНЫҢ ОРЫНБАСАРЫ: Осы оқу-жаттығу аясында біз үш ауданның орналасқан жерін таңдадық. Бұл бізде Бұланды, Біржан Сал және Бурабай бар. Орман алқаптарының негізгі аумағын осы үш аудан алып жатқандығына байланысты. Осыған байланысты біз екі ауданның, соның ішінде облыстық өзара іс-қимыл қызметтерінің, табиғи өрттермен байланысты төтенше жағдайларды жою жөніндегі барлық өзара іс-қимылдарды пысықтау үшін осы орынды таңдадық. Бұл орман да, дала да, жайылма да табиғи өрттер болуы мүмкін.
РКС: Сондай-ақ, облыстық төтенше жағдайлар департаментінің бастығы Бақытжан Алашов пен облыс әкімінің орынбасары Мұрат Балпанның төрағалығымен қорытынды кеңес өтті. Басшылық оқу-жаттығуларды қорытындылап, болашаққа арналған басым міндеттерді белгіледі.
НҰРСӘУЛЕ МҰРАТ, ЭДУАРД ПОГРЕБИЦКИЙ, БАУЫРЖАН СМАҒҰЛОВ, АРДАҚ ТІЛЕУҒАБҰЛОВ, КӨКШЕ АҚПАРАТ