ДИКТОР: Мемлекет басшысы Қасым-Жомарт Тоқаев 2025 жылды - жұмысшы мамандықтар жылы деп жариялады. Президент адал әрі табанды еңбегімен табысқа жеткен азаматтар қашанда құрметті, сыйлы болуы керек. Қоғамда еңбекқорлық, кәсібилік сияқты қасиеттер өте жоғары бағалануы тиіс екендігін атап өтті. Себебі жұмысшы мамандықтары – ел экономикасының қозғаушы күші. Адал еңбегімен нанын тауып жүрген «ЕНКИ» серіктестігінің қаптаушы- операторы – Ержан Искуженов туралы тілшіміз баяндайды.
РКС: Қаптаушы оператор - түрлі тауарды қаптамаға салып, орайтын жұмысшы. Ол өнімді сапасына, пайдалану және тасымалдау шарттарына сәйкес қаптауы тиіс. Мұндағы басты мақсат – тауардың бүтін күйінде тұтынушыға жеткізілуін қамтамасыз ету.
СНХ: ЕРЖАН ИСКУЖЕНОВ, ҚАПТАУШЫ ОПЕРАТОР: Мен 2018 жылдан бастап «ЕНКИ» зауытында жұмыс істеймін. Алдымен көмекші жұмысшы болып жұмыс істедім, кейін оператор деңгейіне дейін өстім. Көмекші жұмысшы болған кезімде бос уақытымда жабдықтармен танысып, оператор мамандығын иелену үшін дайындалып жүрдім. Жұмысым өзіме ұнайды. Мемлекет тарапынан жұмысшы мамандықтарына қолдау көрсетіліп жатыр. Елімізде қажырлы еңбектің мемлекеттік деңгейде бағаланып жатқанына қуаныштымын.
РКС: Қаптаушы-оператор мұқият әрі шапшаң болуы тиіс. Барлық нұсқауларды нақты орындау қажет. Жұмысын абыроймен атқарып келе жатқан Ержан Искуженов өз ортасында сыйлы. Әр ісіне асқан жауапкершілікпен қарайды,-дейді әріптестері.
СНХ: МАРЛЕН АМРИН, ӘРІПТЕС: Осы уақыт аралығында Ержан Искуженов өзін тек жақсы қырынан көрсетті. Жұмысына адал, жауапкершілігі мол азамат. Көмек сұрасаң, өз білгенін үйретуден жалыққан емес.
РКС: Ержан бос уақытында салауатты өмір салтын ұстанып, спортпен шұғылданады. Бүгінде үлгілі әке, арқа сүйір отағасы жұбайымен екі бала тәрбиелеп отыр.
ЖАНАР МҰҚЫШЕВА, ЗАРИНА САПАРҒАЛИЕВА, ПАВЕЛ СОЛОВЬЕВ, КӨКШЕ АҚПАРАТ