ДИКТОР: 1960-шы жылдары «Сонарда», «Әжем және мен», «Кімнің мекені жақсы», «Сыңар бәтеңке» атаумен алғаш жарыққа шыққан кітаптарымен Сәкен Жүнісов балалардың сүйікті жазушысына айналды. Одан соң жазушы драма жанрында қалам тербеп, талай тұшымды шығармасы оқырманға жол тартты. Қазақ әдебиетінің өркендеуіне өлшеусіз үлес қосқан Қазақстанның халық жазушысы Сәкен Жүнісовтың туғанына биыл 90 жыл толып отыр. Атаулы күнге орай оның туған өлкесі Көкшетауда Жанайдар Мусин атындағы қазақ жоғары педагогикалық колледжінде «Ұлылығын ұлықтаған ұлы тұлға» атты әдеби-сазды кеш өтті. Шара барысында тұғыры биік тұлғаның шығармалары талқыланып, колледж студенттері жиналған қонақтарға ерекше сазды кеш сыйлады. Тілшіміз Нұрсәуле Мұратқызы баяндайды.
РКС: Қазақ әдебиетінің дамуына өлшеусіз үлес қосқан шоқтығы биік тұлғаның “Ақан сері” трилогиясы, “Жапандағы жалғыз үй”, “Аманай мен Заманай” романдары қалың оқырманның биік бағасын алды. Сондай-ақ, “Өліара” пьесасы үшін 1986 жылы Қазақстан Республикасының Мемлекеттік сыйлығы берілді. Сәкен сері сегіз қырлы бір сырлы өнер иесі. Домбырасын ақырын ғана шертіп отырып, Ақан серінің әндерін нақышына келтіре орындайтын. Әсіресе, «Майда қоңыр» жүрегіне ең жақын әндердің бірі болатын,-дейді қатысушылар.
ИНТЕРШУМ:
СНХ: ЖӘНІБЕК БЕРДІМҰРАТ, Ж.МУСИН АТЫНДАҒЫ КӨКШЕТАУ ЖОҒАРЫ ҚАЗАҚ ПЕДАГОГИКАЛЫҚ КОЛЛЕДЖІНІҢ ОҚЫТУШЫСЫ: Жалпы бұл әдеби кешті ұйымдастырудағы басты мақсатымыз студенттермен осы өсіп келе жатқан өскелең жас ұрпақ арасындағы ақынның, жазушының шығармашылығын насихаттау. Оның ішінде өздеріңіз білесіздер, «Жапандағы жалғыз үй», «Аманай мен Заманай» сынды кесек-кесек туындылары бар. Жалпы бұл оқыған адамға тәрбиелік, тағылымдылық терең ой беретін, жол көрсететін туындылар болып табылады.
РКС: Қазақ прозасының майталманы, марқасқа жазушы Көкшеден түлеп ұшқан. Оқжетпестей дара, Жұмбақтастай жұмбақ сол бір сәулетті суреткер қазақ прозасына үлкен табыс әкелді. Қаламгердің озық туындылары халқының рухани қазынасына айналып, болашақ ұрпаққа мұра болып қалды. Әдебиеттің қай жанрында болмасын өшпес із қалдырған жұлдызы биік жазушының шығармалары өскелең ұрпақтың есінде де ерекше қалары анық.
СНХ: АРУЖАН АРНАШ, Ж.МУСИН АТЫНДАҒЫ КӨКШЕТАУ ЖОҒАРЫ ҚАЗАҚ ПЕДАГОГИКАЛЫҚ КОЛЛЕДЖІНІҢ СТУДЕНТІ: Біз үшін бір жанын қалдырып кетті десек болады. Себебі біз оны оқығанда, мысалы «Қайырлы таң» повесі деген, «Балзия» деген повесі бар, одан үлкен бір өмірлік жолымызға деген ұстаным тауып алуымызға болады. Сондықтан Сәкен Жүнісов туралы білу біздің парызымыз, ол үлкен бір ғұлама ақын және үлгі тұтар адам ретінде біз қарастыру керекпіз.
СНХ: ФАРХАД МҰРАТБЕК, Ж.МУСИН АТЫНДАҒЫ КӨКШЕТАУ ЖОҒАРЫ ҚАЗАҚ ПЕДАГОГИКАЛЫҚ КОЛЛЕДЖІНІҢ СТУДЕНТІ: Өзіміз білетіндей, Сәкен Жүнісовтың көптеген шығармаларымен, поэмаларымен таныспыз.Оның ішіндегі мынау, тәрбие танымымен, белгілі танымал болғаны «Аманай мен Заманай». Өзінің тәрбиелік мәнімен келер ұрпаққа, артынан оқып келе жатқан оқырмандарға деген өте мағыналы бір шығарма. Сол сияқты терең мәнді шығармалары көп.
РКС: Әдеби-сазды кеш барысында көрнекті жазушының шығармаларынан үзінді оқылды. Жазушылығымен қатар Сәкен сері әншілігімен де елдің есінде қалған тұлға. Сері деген атқа лайық, әншілігі мен талғамы да жоғары. Тіптен Көкшенің көк серісінің алдында менмін деген әншінің өзі де әнін таңдап, имене орындайтын болған. Кеш барысында, қазақ зиялыларының Сәкен Жүнісовтың әдеби ерлігі мен еңбек жолындағы есті естеліктерінен әсерлі әңгіме төкті.
ИНТЕРШУМ:
НҰРСӘУЛЕ МҰРАТ, ДАНИЯР ЖҰМАҒҰЛОВ,АРДАҚ ТІЛЕУҒАБЫЛОВ, КӨКШЕ АҚПАРАТ