ДИКТОР: Абай Мырзахметов атындағы Көкшетау университетінің жасөспірімдер құрамасы волейболдан Астанада өткен 2024 жылғы республикалық студенттік спорт лигасында екінші орын алды. Мұндай спорттық табысқа аянбай жаттығудың нәтижесінде қол жеткізген олар енді алдағы жарыстарға дайындық үстінде.
РКС: Байрақты бәсеке Қазақстанның 700-ден аса талантты студент-спортшыларының жігерін шыңдады. Абай Мырзахметов атындағы Көкшетау университетінің құрамасы 7 матчтың қорытындысы бойынша 6 ойында жеңіске жетті. Өкінішке орай, олар финалда Алматы Қазақ туризм және спорт Академиясының өкілдеріне есе жіберді.
СНХ: ЕРСҰЛТАН ҚАБЫЛ, ЖҮЛДЕГЕР: Біз екінші орынға ие болдық, біз бұған өте қуаныштымыз. Шынымды айтсам, бұл деңгей мені таң қалдырды. Шыны керек нәтиже нашар болады деп ойладым. Бірақ біздің жігіттер жарады, көп тырыстық. Біз тамыз айынан бастап жаттығуды бастаған болатынбыз. Сондықтан еңбегіміз ақталды.
СНХ: НҰРСҰЛТАН ДӘУРЕНБЕКҰЛЫ, ЖҮЛДЕГЕР: Өте жақсы турнир болды, өте эмоционалды турнир болды. Көптеген қиын командалар болды. Бірақ соған қарамастан финалға жетіп, енді кішкене жетпесе де, бізден күткен үміт ақталды деп ойлаймыз. Екінші орын да жаман емес деп ойлаймын.
РКС: Университет басшылығы спортшы студенттерге қол жеткізген жетістіктері үшін алғысын білдірді. Волейболдан құрама мүшелеріне алғыс хаттар мен ақшалай сыйлықтар табысталды.
ИНТЕРШУМ:
СНХ: САҒЫНТАЙ ЕЛУБАЕВ, А.МЫРЗАХМЕТОВ АТЫНДАҒЫ КӨКШЕТАУ УНИВЕРСИТЕТІНІҢ РЕКТОРЫ: Жеңіспен біздің ерлер командасы, республиканың үздік 16 командасы арасында құрметті екінші орынға ие болып, күміс жүлдегер атанды. Мен барлық спортшыларымызға, барлық студенттерімізге жарыстарда сәттілік тілеймін. Ең бастысы, спорт сіздердің денсаулықтарыңызды нығайта түседі, одан әрі дамуға мүмкіндік береді деп айтқым келеді.
РКС: Университет жанындағы Студенттер сарайы жастардың сабақтан кейін бос уақытын тиімді өткізуге мүмкіндік беруде. Жалпы осы жоғары оқу орнының студенттері спорттың 12 түрімен айналысуда.
САБИНА ЖАМШИТОВА, ҚАЙЫРБЕК ТӨЛЕГЕНОВ, БАУЫРЖАН СМАҒҰЛОВ, КӨКШЕ АҚПАРАТ