ДИКТОР: Өрт сөндірушілер өз өмірін қатерге тігіп, өзгені құтқаруға жанталасатын нағыз батырлар. Біздің түсірілім тобы төтенше жағдайлар қызметінде 13 жылдан астам еңбек етіп келе жатқан маманның бірімен танысып қайтты.
РКС: Өрт сөндірушінің кәсібін нағыз қаһармандықтың символы деп атауға болады. Евгений Ефремов Көкшетаудағы №1 мамандандырылған өрт сөндіру бөлімінде бөлімше командирі болып жұмыс істейді. Күні бүгінге дейін ол өз командасымен басын түрлі қатерге тігіп келе жатыр. Қызметіне адал. Кейіпкеріміз бізбен әңгіме барысында көптеген әріптесі қызметте жүрген сәтінде ертеңгі күнді ойлауға мұршасы да келмейтінін жеткізді. Өйткені, өлім мен өмірдің арасындағы адамдарды құтқару басты қағидалары. Дабыл келіп түскен бетте бірден оқиға орнына аттанады.
СНХ: ЕВГЕНИЙ ЕФРЕМОВ, №1 МАМАНДАНДЫРЫЛҒАН ӨРТ СӨНДІРУ БӨЛІМІНІҢ БӨЛІМШЕ КОМАНДИРІ: Өрт сөндірушіге қандай қауіп төнуі мүмкін деген заңды сұрақ туындайды. Ешқашан оқиғаны болжау мүмкін емес. Оқиға орнына шыққан кезде өрт болып жатқанынан ғана хабардар боламыз. Ал оның салдары қандай болады, оны ойлануға уақыт жоқ. Өрт жарты сағат, бір сағат, 2 минут бұрын, немесе енді ғана басталуы мүмкін.
РКС: Евгений Ефремов өртті сөндіруші ғана емес, сонымен қатар тұрғындардың қауіпсіздігі мен мүлкін қорғауға қатысты өзге де міндеттерді орындаумен айналысады. Құтқарушы өз командасымен үнемі жол-көлік оқиғасы орын алған жерге барады. Жол-көлік оқиғасына түсіп қалған адамдарды көліктен шығарады. Су тасқыны кезінде арнайы техниканың күшімен оның салдарын жою шараларына қатысады. Қыс мезгілінде боранды күндері жолда қалып қойған адамдарды құтқарады.
СНХ: НҰРБЕК ЕРАЛЫ, МАМАНДАНДЫРЫЛҒАН ӨРТ СӨНДІРУ БӨЛІМІНІҢ ЖҮРГІЗУШІ-ҚЫЗМЕТКЕРІ: Евгений Ефремов қызметіне адал, достыққа берік азамат. Қызмет барысында көптеген адамның өмірін сақтап қалды. Евгений жүрегі кең адам, бізге әрдайым қамқор болып жүреді. Егер біреуге бірдеңе керек болса, үйретіп, түсіндіріп,бағыт-бағдар береді. Қашан да көмек қолын созады.
РКС:Негізгі қызметінен бөлек Евгений ұзақ жыл спорттық туризмнен жаттықтырушы болып та еңбек етеді. Ол жастайынан Азаматтық қорғаныс саласында қызмет етуді армандапты. Бүгін сол арманы орындалып, абыройлы еңбек етіп жүр.
САБИНА ЖАМШИТОВА, ВЕРОНИКА ЦВЕТКОВА, БАУЫРЖАН СМАҒҰЛОВ, КӨКШЕ АҚПАРАТ