Сандық шешімдер уақыты

ДИКТОР: Бүгін Қазақстанда цифрландыру күні. Осы мерекеге орай Көкшетауда «SmartCityAccelerator Demo Day» аясында инновациялық әзірлемелер таныстырылып, саланың үздік мамандарын марапаттау рәсімі өтті. Басты мақсат – перспективалы жобаларға қолдау көрсету және еліміздің цифрлық дамуына үлес қосқан азаматтардың еңбегін атап өту.  

РКС: Қазақстанның әр өңірінен келген он стартап командасы қалалық инфрақұрылымды, ауыл шаруашылығын, қоршаған ортаны және қоғамдық қауіпсіздікті цифрландыруға бағытталған шешімдерін ұсынды. Қатысушылар сегіз апта бойы өз идеяларын жетілдіріп, жергілікті билік органдарының талаптары негізінде анықталған нақты технологиялық мәселелерді шешумен айналысты. Ұсынылған жобалардың қатарында Ақмола облысының цифрлық картасы бар. Ол өңірдің әлеуметтік және инженерлік инфрақұрылымына қатысты деректерді бірыңғай ақпараттық жүйеге біріктіруге арналған.

СНХ: ДАНИЯР НҰРПЕЙІСОВ, «KOKSHE» ӘЛЕУМЕТТІК-КӘСІПКЕРЛІК КОРПОРАЦИЯСЫ ЖАНЫНДАҒЫ УРБАНИСТИКА ОРТАЛЫҒЫНЫҢ БАСШЫСЫ: Басқаша айтқанда, біз ғимараттарды қалай цифрландыру және оларды «Қазстрой» жүйесіне қалай біріктіру керектігін нақты түсінеміз. Ғимараттар жүйеге қосылғаннан кейін, біз бүкіл инфрақұрылымның және қаланың өзара байланысқан жүйе ретінде қалай жұмыс істейтінінің толыққанды визуализациясын жасай аламыз. Біз бұл жобаны акселератор бағдарламасына қатысу барысында әзірлей бастадық, бұл өте жақсы нәтижелер берді. Атап айтқанда, біз Атбасар қаласын пилоттық жоба ретінде пайдалана отырып, деректерді Ақмола облысының серверлеріне көшірдік. Осы жұмыс аясында 22 әлеуметтік нысанды, сондай-ақ инженерлік және әлеуметтік инфрақұрылымға жататын басқа да барлық ғимараттарды жүйеге енгізіп, картаға түсірдік. 

РКС: DemoDay қатысушылары ерекше назар аударған тағы бір сала – қауіпсіздік. Елордада орналасқан компанияның командасы GetVision деп аталатын жобаны ұсынды. Жасанды интеллект пен компьютерлік көру технологияларын қолданатын бұл жүйе әдеттегі бақылау камераларынан түсетін бейнежазбаларды талдап, қауіп төндіруі мүмкін жағдайларды анықтайды. Аталған шешім Астанадағы тоғыз мектепте пилоттық сынақтан өтіп үлгерді. Келесі кезеңде бұл технологияны Көкшетаудағы білім беру мекемелерінде енгізу жоспарланып отыр.

СНХ: ӘЙГЕРІМ СЕЙІЛБЕКОВА, КОМПАНИЯНЫҢ ЖОБА МЕНЕДЖЕРІ /АСТАНА қ./: Біз стандартты сандық камераларды қолданамыз және оларға компьютерлік көру модельдерін енгізу арқылы түрлі оқиғаларды, соның ішінде жанжалдарды анықтаймыз. Мектеп ортасында бұл қорлау, төбелес немесе басқа да қауіпті жағдайлар болуы мүмкін. Қорлау мәселесі бүкіл әлемде, соның ішінде Қазақстанда да өте өзекті болып отыр. Қазақстан Президенті де мұны еліміздегі шешуді қажет ететін маңызды мәселе ретінде атап өтті. Сонымен қатар, жасанды интеллект саласы қарқынды дамып келеді. Біз осы мүмкіндікті пайдалана отырып, мұндай өзекті мәселелерді шешуге және балаларымыз үшін бақытты әрі қауіпсіз болашақ қалыптастыруға үлес қосуды жөн көрдік.

РКС: Ұйымдастырушылар атап өткендей, бағдарламаның басты мақсаты — қаланы жай ғана жаңа технологиялармен таныстыру емес, күнделікті өмірге енгізуге болатын нақты шешімдерді табу. Осы мақсатта жергілікті билік органдары анықтаған нақты қажеттіліктерді анықтау үшін еліміздің түкпір-түкпірінен стартаптар жиналды. 50-ден астам өтінімнің ішінен ең перспективалы он команда финалдық таныстырылымға жолдама алды.

СНХ: АНДРЕЙ КРЮКОВ, «SMART CITY ACCELERATOR» БАҒДАРЛАМАСЫНЫҢ ЖЕТЕКШІ БАҚЫЛАУШЫСЫ: Біз қалаға пайда әкелуге бағытталған шешімдерді таңдап алдық. Стартаптар қаланы жақсартуға, тұрғындар мен қонақтардың өмір сүру сапасын арттыруға үлес қоса алады. Сондай-ақ, олар жергілікті әкімдікке қалалық ортаны жақсарту жөніндегі күнделікті жұмыстарында қолдау көрсетуі де мүмкін. «Ақылды қала» — «цифрландыру» сияқты өте ауқымды ұғым, ал біз күн санап дамып келе жатқан жаңа цифрлық дәуірде өмір сүріп жатырмыз. Қазақстан қалалары цифрландыру тұрғысынан қазірдің өзінде айтарлықтай дамыған, бұл ретте стартаптар қосымша қолдау көрсетіп, қалаларды түрлі бағыт бойынша одан әрі «ақылдырақ» етуге көмектеседі.

РКС: SmartCityAcceleratorDemoDay іс-шарасы тәжірибе алмасу, инновациялық идеяларды ұсыну және өңірлерді цифрлық дамытудың жаңа мүмкіндіктерін қарастыру алаңына айналды. «Цифрландыру күні» салтанатты рәсіммен жалғасып, онда саланың дамуына үлес қосқан мамандар марапатталды. Қонақтар мерекелік концерттік бағдарламаны, би қойылымдарын тамашалап, сыйлықтарға ие болды. Бұл шара IT қауымдастығы өкілдерін, әзірлеушілерді және Қазақстанның цифрлық болашағын қалыптастыру жолында еңбек етіп жүрген барша жандарды бір арнаға тоғыстырды.

ГӘККУ АСЫЛБЕКҚЫЗЫ, ЗАРИНА САПАРҒАЛИЕВА, ПАВЕЛ СОЛОВЬЕВ,ЖАМБЫЛ БАЛТАЕВ, КӨКШЕ АҚПАРАТ