ДИКТОР: «Әлеуметтік әмиян» пилоттық жобасы Ақкөл ауданында белсенді іске асырылуда. Мемлекеттен атаулы әлеуметтік көмек алатын азаматтар енді азық-түлік тауарларын төмендетілген бағамен сатып ала алады. Бұл үшін оларға цифрлық ваучерлер ұсынылған. Жаңа қолдау жүйесі қалай жұмыс істейді және ол тұрғындармен қатар кәсіпкерлерге қандай мүмкіндіктер береді? Тілшіміз Нұрсәуле Мұрат баяндайды.
РКС:Ақкөл қаласында 12 отбасы «Әлеуметтік әмиян» жобасының игілігін көріп отыр. Солардың бірі – Нагорняк отбасы. Бес баланың анасы, үй шаруасындағы Мария Нагорняк мемлекеттен атаулы әлеуметтік көмек алады. Тамыз айынан бастап ол әлеуметтік маңызы бар азық-түлік тауарларын жеңілдікпен сатып алу мүмкіндігіне ие болды.
СНХ:МАРИЯ НАГОРНЯК, АТАУЛЫ ӘЛЕУМЕТТІК КӨМЕК АЛУШЫ: Мен осы дүкеннен ваучер бағдарламасымен жеңілдікпен азық-түлік сатып аламын, бұл өте ыңғайлы. QR арқылы төлеу оңай, ал жеңілдікпен сатып алу тиімді. Негізінен сүт, қарақұмық, қант, май сияқты бірінші қажеттіліктегі өнімдер.
РКС:Атаулы әлеуметтік көмек алатын тағы бір тұрғын Гүлмира Жақсыбаева да «Әлеуметтік әмиянды» пайдалануда. Әлеуметтік маңызы бар тауарлар сатылатын сөрелерде арнайы жапсырмалар орнатылған. Ол өнімнің жеңілдікпен сатылатынын білдіреді.
СНХ: ГҮЛМИРА ЖАҚСЫБАЕВА, АТАУЛЫ ӘЛЕУМЕТТІК КӨМЕК АЛУШЫ:
Әлеуметтік әмиян өте ыңғайлы. Келемін де, қажет заттарымды жеңілдікпен аламын. Отбасыммен бірге жармалар мен сүт өнімдерін сатып аламыз.
РКС:«Орда» сауда орны ұлттық тауарлар каталогына қосылған. Бұл супермаркетте әлеуметтік маңызы бар 19 азық-түлік өнімі толық қамтылған. Жоба аясында болашақта басқа да сауда нүктелерін қосу жоспарланған. Ал кәсіпкерлерге қолдау ретінде жеңілдетілген несие беру көзделуде.
СНХ:ЕРЛАН МҰХАМЕДИН, ОБЛЫСТЫҚ ЖҰМЫСПЕН ҚАМТУ ЖӘНЕ ӘЛЕУМЕТТІК БАҒДАРЛАМАЛАРДЫ ҮЙЛЕСТІРУ БАСҚАРМАСЫ БАСШЫСЫНЫҢ ОРЫНБАСАРЫ: Ақпараттық жүйе арқылы әр отбасы сараланады. Мемлекеттік органдардың деректері негізінде осы бағдарламаға қатысуға лайықты азаматтардың тізімі жасалады. Кейін оларға SMS-хабарлама жіберіледі. Егер адам қатысуға келісімін берсе, оның атына автоматты түрде ваучер ашылады. Әр отбасы мүшесіне осындай ваучерлер рәсімделеді.
РКС:Айта кету керек, платформада ваучерлер ай сайын ұсынылады. Егер азамат бұл мүмкіндікті осы мерзімде пайдаланбаса, олар жойылады. Келесі айда жауапты мамандардың қарауымен қайта есептеліп, жаңадан беріледі. Жобаға деген сұраныс жоғары болғандықтан, оны Ақкөл ауданынан кейін Көкшетауда да жүзеге асыру жоспарланып отыр. Қазір бұл бағытта дайындық жұмыстары жүргізілуде.
НҰРСӘУЛЕ МҰРАТ, ВЕРОНИКА ЦВЕТКОВА, САБЫРБЕК ШЕРИЯЗДАНОВ, КӨКШЕ АҚПАРАТ