ДИКТОР: Елімізді түбегейлі жаңғырту үшін ауқымды реформалар жасалып жатқаны белгілі. Үш жылдың ішінде Қазақстан жаңа тұрпатты ел болды. Саяси реформалар жан-жақты өзгерістер жасауға мүмкіндік берді. Жалпыхалықтық референдум арқылы ата заңға түзетулер енгізіліп, жаңа заңдар қолданысқа берілді. Тек ресми құжаттар ғана емес, қазақтың ұлттық киіміне де өзгертулер енгізіліп халықтың тікелей қолдануына беріліп отыр.
РКС: Әр адамның келбетін ашатын үстіне киген киімі екені анық. Ал әр ұлттың ұлттық киімі тайға таңба басқандай алыстан мен мұндалайтыны тағы бар. Сонымен қатар, әр ұлтты өзгеден ерекше етер өзіндік бірнеше факторларын көрсетуге болады. Атап айтсақ, олар діні, тілі, ұлттық киімі. Талай ақынның тілінен бал тамыза жырлаған үкілі кәмшат пен бүрмелі көйлектің қадірін түсініп, ұлттық құндылықты дәріптеуді қолға алу қажет,-дейді ақмолалықтар.
СНХ: МАРАЛ ЖАҚЫПОВА, ҚОҒАМ ҚАЙРАТКЕРІ: Соңғы жылдары ұлттық киімді тек қана наурыз тойда ғана емес, ағайын арасындағы той-томалаққа да, күнделікті өмірге де мақтана киіп жүретін деңгейге жеттік. Ата-бабамыздан аманат болып қалған салт-дәстүрімізді, әдет-ғұрпымызды бүгінгі заманға сай жаңғыртып, жаңартып алып келе жатқаны, кейінгі ұрпаққа үлгі ететіні қуантады.
РКС: Соңғы жылдары ұлттық киімнің мәні мен мағынасы жаңа сипат алды. Бұрынғы дәстүрлер мен қазіргі үлгілердің озығын біріктіре отырып, жаңа қазақы сәндік киімдері пайда болуда. Заман талабына сай тігілген ұлттық киімдерге сұраныс та артып, қазақы заманауи бренд қалыптастыру жақсы үрдіске айналып келеді. Дәстүрлі киімдердің ғажап көрінетінін Президент Қасым-Жомарт Тоқаевта Бурабайда өткен Ұлттық құрылтайда да айтып өтті.
СНХ: ҚАСЫМ-ЖОМАРТ ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ: Ұлттық киімдерге деген қызығушылық арта түсті. Мектептерде, түрлі мекемелерде, сондай-ақ, ірі компанияларда ұлттық киімге мән беріле бастады. Сұранысқа сай тігін цехтары ашылып, жаңа брендтер, дүкендер пайда болды.Осылайша, ұлттық киім кию біртіндеп қалыпты көрініске айналып келеді. Бұл – өте жақсы үрдіс.Бет-жүзді тұмшалайтын қара киімнен гөрі өзіміздің ұлттық киімдеріміз әлдеқайда артық. Әсіресе, әйелдердің дәстүрлі киімі өте ғажап көрінеді. Себебі ұлттық киім, бұл – біздің бірегей ұлттық болмысымыздың маңызды көрінісі. Оны жан-жақты дәріптеуіміз керек.
РКС: Ұлттың мәні де сәні де, ұлттық болмыста ұлттың дәстүрлі киімінде, рухани көкірек көзімізде. Кез-келген ұлттың киімі, елдің бет-бейнесі, көркі, адамзат шырайын ашатын сырлы сымбатқа толы рухани құндылық екені сөзсіз.
НҰРСӘУЛЕ МҰРАТ, ДАНИЯР ЖҰМАҒҰЛОВ, БЕКЖАН ТӨЛЕБЕК, КӨКШЕ АҚПАРАТ