ДИКТОР: Тұрғындарды экологиялық акцияларға тарту жұмыстары белсенді жүргізілуде. Биыл күзде Ақмола облысында 30 мыңға жуық адам аумақтарды тазалауға қатысты. 100 мың шаршы метрден астам жер қоқыстан тазартылды. Шамамен 25 мың ағаш пен бұта отырғызылды. Қазір қандай экологиялық мәселелер өзекті болып тұрғанын және осы бағытта қандай нақты шаралар қабылданғаны туралы тілші баяндайды.
РКС: «Таза Қазақстан» акциясы шеңберіндегі іс-шаралар мен басқа да экологиялық бастамалар еріктілер, студенттер және жұмысшы жастардың белсенді қатысуымен өткізіледі. Мұндай ынтымақтастық қоғамның әр түрлі топтарын қоршаған ортаны қорғау ісіне тартуға мүмкіндік береді. Азаматтарда табиғатқа жауапкершілікпен қарау мәдениетін қалыптастырады.
СНХ: СҰЛТАНБЕК БЕКЕШЕВ, «АМАNAT» ПАРТИЯСЫ «ЖАСТАР РУХЫ» ЖАСТАР ҚАНАТЫ АҚМОЛА ОБЛЫСТЫҚ ФИЛИАЛЫНЫҢ ТӨРАҒАСЫ: Өкінішке қарай, бүгінде қоғамдағы экологиялық мәдениет деңгейі көңіл көншітпейді. Бұл тек жастарға емес, ересек буын мен жасөспірімдерге де қатысты мәселе. Қаланың ортасында, тұрғын үйлердің маңында үйіліп жатқан қоқыс немесе ауыл ішіндегі жол бойында шашылған тұрмыстық қалдықтар – осының айқын дәлелі. Сондықтан қазір экологиялық сананы қалыптастыру, табиғатқа жанашырлық көзқарасты тәрбиелеу – біздің міндет. Біз бұл бағытта түрлі экологиялық акциялар өткізіп, ағаш отырғызу жұмыстарын тұрақты түрде ұйымдастырамыз. Әрбір жастың бойында белсенді азаматтық ұстаным мен бейжайлыққа қарсы көзқарас қалыптастыруға күш саламыз. Сонымен бірге, вандализмге қарсы арнайы бастамамыз бар. Бұл да қоғамдағы жауапкершілікті арттыруға бағытталған маңызды қадам.
РКС: Жаппай тазалау және ағаш отырғызу шараларынан бөлек, табиғи және мәдени нысандарды қорғауға да ерекше көңіл бөлінуде. Мысалы, Бурабай курорттық аймағында тастарға жазулар қалдырып, зақым келетін жағдайлар да кездеседі. Сондай-ақ, кейбір жас жұптар ағаштарға жіп байлайды. Бірақ бұл өсімдіктерге зиян тигізуі мүмкін. Байланған жіптер кеуіп, ағаштар әлсіреп, кейде өліп қалуы да ықтимал, – дейді волонтёрлер.
СНХ: АЛЕКСАНДРА ГОМОНОВА, КӘСІПОДАҚТАР ЖАНЫНДАҒЫ ОБЛЫСТЫҚ «КЕЛЕШЕК» ЖАСТАР КЕҢЕСІНІҢ ТӨРАЙЫМЫ: Қысқа уақыттың ішінде біз де жұмысшы жастармен, белсенділермен және студенттермен бірге «Таза Қазақстан» республикалық акциясына белсене атсалыстық. Ең әуелі мынаны атап өткім келеді: қай жерде өмір сүрсек, сол ортаға жанашырлықпен қарап, тазалығын сақтауға әрқайсымыз жауаптымыз. Қоқыс тастамау, тазалықты өз қолымызбен қалыптастыру өз қолымызда. Шын мәнінде, ең үздік қала - тұрғындары табиғатқа ұқыпты, экологиялық мәдениеті жоғары қала. Сондықтан біз жұмысшы жастармен және студенттермен бірлесе отырып, барша азаматты қоршаған ортаны қорғауға, табиғатқа жауапкершілікпен қарауға шақырамыз.
РКС: Ұйымдастырушылар экологиялық ағартушылық шаралары қыс мезгілінде де жалғасатынын атап өтті. Жастардың және тұрғындардың бірлескен еңбегі қоршаған ортаға жауапкершілікпен қарауды қалыптастырып, табиғатты қорғауды жақсартуға мүмкіндік береді.
СӘНИЯ ЕСІМСЕЙІТОВА, ЖАНДОС САЙЛАУ, САБЫРБЕК ШЕРИЯЗДАНОВ, КӨКШЕ АҚПАРАТ