ДИКТОР: Қала ішіндегі ойық жолдар жүргізушілердің көліктеріне зақым келтіріп қана қоймай, жаяу жүргіншілер үшін де қолайсыздық туғызуда. Мәселен, Міржақып Дулатов көшесінің бойында орналасқан үйлердің тұрғындары апатты жолдың жағдайына алаңдаушылық білдіріп отыр.
РКС: Міржақып Дулатов көшесі, нақтырақ айтсақ, 77-ші үйдің алдындағы жол әбден тозған. Көше көп жылдан бері жөндеу көрмеген. Шұрық-тесік жол, жарықтың жетіспеушілігі - қала тұрғындары мен жүргізушілерге қолайсыздық тудырып қана қоймай, жол қозғалысына да қауіп төндіруде. «Жол қауіпсіздігін қамтамасыз ету, жалпы жол мәселесі қала бойынша әлі де өзекті» - дейді тұрғындар.
СНХ: АЛЕКСАНДР НОВИКОВ, ҚАЛА ТҰРҒЫНЫ: Бірнеше жылдан бері мына жолдың азабын тартып отырмыз. Бұл мәселені қарастырып, шешімін табамыз деген уәде берді. Өздеріңіз көріп тұрғанығыздай «құрғақ уәдемен» тойдырып, біздің жан айқайымызға ешкім құлақ аспады. Ал мына шұңқырға қыста адамдар құлап, жүргізушілер де көліктерін зақымдап жатыр. Шұңқырдың тереңдігі тізеге дейін. Тіпті жол талғамайтын көлікпен жүргеннің өзінде қолайсыздық тудырады.
СНХ: НАЗГҮЛ НУРКУШЕВА, ҚАЛА ТҰРҒЫНЫ: Біз мұнда 2022 жылдан бері тұрамыз. Өкінішке қарай, әлі күнге дейін жол жөнделмеді. Ойық жол, аяқ басар жер жоқ. Қаланың орталығында тұра, осындай мәселенің шешілмеуі - ақылға қонымсыз.
РКС: Өз кезегінде қалалық тұрғын үй-коммуналдық шаруашылығының басшысы Дулатов көшесіндегі жолды жөндеу жобасы әзірленіп, қазір сараптама сатысында,- деп сендірді.
СНХ: ӘДІЛЕТ РАҚЫМЖАНОВ, ҚАЛАЛЫҚ ТҮКШ, ЖОЛАУШЫЛАР КӨЛІГІ, АВТОМОБИЛЬ ЖОЛДАРЫ ЖӘНЕ ТҰРҒЫН ҮЙ ИНСПЕКЦИЯСЫ БӨЛІМІНІҢ БАСШЫСЫ: Дулатов көшесінде тұратын тұрғындардың шағымдарына қатысты, бүгінде орташа жөндеу бойынша жоба әзірленіп жатыр. Оны әзірлеп, сараптамадан өткен соң қалалық не облыстық бюджетке өтініш жібереміз. Қазір жоба сараптамада. Мамыр айында конкурстық рәсімнен өткізгеннен кейін мердігер анықталады.
РКС: Сондай-ақ, алдағы уақытта Назарбаев көшесі мен «Жайлы мектепке» барар жолға да орташа жөндеу жүргізу жоспарлануда.
ЖАНАР МҰҚЫШЕВА, ВЕРОНИКА ЦВЕТКОВА, САБЫРБЕК ШЕРИЯЗДАНОВ, КОКШЕ АКПАРАТ.