ДИКТОР: "Аңқау елге арамза молда". Қазір халық арасында "инфосыған" аталып кеткен ақылдарын ақшаға сататын жалған коучтар мен психолог сымақтардың саны артып барады. Осы тақырып төңірегінде Мемлекет басшысы ұлттық құрылтайда келелі мәселе көтерді. Тілші баяндайды.
РКС: Өздерін сарапшы, психолог деп, құнсыз ақпаратты ақшаға сатып, шынайы психологтардың беделін түсіріп жүрген "инфосығандар" жетіп артылады. Бірі тез баюдың жолын үйретеміз десе, енді бірі тұрмыс тауқыметінен шығудың жолын көрсетеміз деп адамдарды оңай қармағына ілуде. Аталмыш жалған коуч сымақтарға сенім артып, курс сатып алатын адамдардың қарасы азаяр емес. Ең қызығы, сол сабақтарға жеңілдік ретінде несиенің бөліп төлеу жүйесін де енгізген.
СНХ: ИРИНА ТЕРЕНТЬЕВА, «ПСИХОЛОГИЯЛЫҚ МӘДЕНИЕТТІ ДАМЫТУ ЖӘНЕ ҚОЛДАУ» ҚОҒАМДЫҚ ҚОРЫНЫҢ БАСШЫСЫ, №4 ОРТА МЕКТЕБІНІҢ ПСИХОЛОГЫ: Ұлттық құрылтайдың отырысында Президент бұл мәселе туралы атап өтті. Тұрғындар еш негізсіз өздерін психолог, коуч деп танытып жүрген дипломсыз мамандардан кеңес алады. Кейбіреулер психология саласын аздап үйреніп алып, өзгелерге ақыл айтуға асығады. Осы бағытта өздерін сарапшы деп санайды. Сондықтан, адамдар осындай мамандарды іздей бастағанда, бізде қандай да бір ұйымдардың ірі қоғамдық бірлестіктердің жоқ екендігіне тап болады. Аманат партиясының бастамасымен қазір заңды-психологиялық көмек көрсету жобасы әзірленіп жатыр. Бұл уақытты талап етеді.
РКС: Президент Қасым-Жомарт Тоқаев аталған тақырыпты өзекті мәселе деп, Бурабайда өткен Ұлттық құрылтайдың IV отырысында құқық қорғау органдарына жалған психологтар мен «коучтардың» әрекетіне жіті бақылау орнатуды тапсырды.
СНХ: ҚАСЫМ-ЖОМАРТ ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ: Қазір жұртқа ақыл айтып ақша табатын жалған психологтар мен «коучтар» көбейіп кетті. Оларға сеніп, алданып қалғандар көп. Маған бұл туралы көптеген шағым түсіп жатыр. Жауапты органдар бұл мәселені де назарға алуға тиіс.
РКС: Кез-келген ақылы курс немесе коучингке жазылмас бұрын, материалдың сапасы мен автордың біліктілігін мұқият тексеру қажет. Ақылды ақшамен емес, нақты әрекетпен жетілдіру маңызды.
СӘНИЯ ЕСІМСЕЙІТОВА, ДАМИР САДЫҚОВ, КӨКШЕ АҚПАРАТ