ДИКТОР: Биыл сыбайлас жемқорлыққа қарсы қызметтің облыстық департаменті өңірдің уәкілетті органдары және қоғам қайраткерлерімен бірлесіп әлеуметтік маңызы бар салалар бойынша бір сыртқы талдау және 3 мониторинг жүргізді. Нәтижесінде анықталған сыбайлас жемқорлық тәуекелдерін жою бойынша 20-дан аса ұсыным мен ұсыныс енгізілді.
РКС: Сыбайлас жемқорлық тәуекелдер картасын іске асыру шеңберінде тұрғын үй-коммуналдық шаруашылық саласында сыртқы талдау жүргізілді. Атап айтқанда, 2021-2024 жылдар аралығында «Көкшетау қаласының тұрғын үй-коммуналдық шаруашылық бөлімі» мемлекеттік мекемесімен 613 мемлекеттік сатып алу шарты жасалған, бірақ 44 процентінде сатып алу жұмыстары жүргізілмеген. Ағаштарды кесуге жұмсалуы керек қомақты бюджеттік шығындар да анықталды. Бұл жұмыстарға 117 миллион теңгеден аса қаржы бөлінген.
СНХ: АСХАТ ОРАЗХАН, ОБЛЫСТЫҚ СЫБАЙЛАС ЖЕМҚОРЛЫҚҚА ҚАРСЫ КҮРЕС ДЕПАРТАМЕНТІНІҢ БАСШЫСЫ: Мұнда бөлінген бюджеттік қаражат көлемінің жыл сайыңғы өсу динамикасын байқауға болады. Егер 2022 жылы осы мақсаттарға шамамен 3 миллион теңге бөлінген болса, 2023 жылы ол қазірдің өзінде 20 миллион теңге болды, ал 2024 және 2025 жылдарға 190 миллион теңге бөлінген. Тексеру барысында 500-ге жуық ағаштың іс жүзінде кесілмегені анықталды, бүгінгі күні алдын ала келтірілген шығын 9,5 млн теңгені құрап отыр.
РКС: Мониторинг барысында су тасқынына қарсы іс-шаралар аясында да заң бұзушылықтар анықталды. Атап айтқанда, төтенше жағдайды жоюға бөлінген қаражат су тасқынынан зардап шекпеген аумақтарда жөндеу жұмыстарын жүргізуге жұмсалғаны анықталды.
СНХ: АСХАТ ОРАЗХАН, ОБЛЫСТЫҚ СЫБАЙЛАС ЖЕМҚОРЛЫҚҚА ҚАРСЫ КҮРЕС ДЕПАРТАМЕНТІНІҢ БАСШЫСЫ: Төтенше жағдайдың салдарын жою шеңберінде көше және жол жиегін тексеру комиссиясы белгіленген тәртіппен бекітілмеген. Нәтижесінде әртүрлі тұлғалар, оның ішінде мемлекеттік сатып алу туралы келісім-шарт жасалған тұлғалар да комиссия мүшелері ретінде қызмет еткен. Көкшетау қаласының тұрғын үй-коммуналдық шаруашылығы бөлімі төтенше жағдай режимі аясында сол кезде мемлекеттік сатып алуға қатысу тізімінде жоқ серіктестікпен мемлекеттік сатып алу туралы шарт жасасқаны анықталды.
РКС: Облыстағы проблемалық инфрақұрылымдық жобаларды аяқтау бойынша жол картасы әзірленіп, бекітілді. Картада 26 сумен, 3 газбен және 2 электрмен жабдықтау нысаны бар. Айта кетерлігі, мұндай нысандардың ең көп саны Целиноград және Бурабай аудандарында орнатылған. Қазіргі таңда әрбір нысанның ағымдағы жағдайы анықталып, құрылыстың аяқталу мерзімі белгіленді.
МАҚПАЛ АЙБАБИНА, АРАЙЛЫМ ШЫТЫРЫМБЕК, ПАВЕЛ СОЛОВЬЕВ, КӨКШЕ АҚПАРАТ.