ДИКТОР: Құтқару қызметіндегі медбикенің жұмысы жай ғана мамандық емес, ол нағыз еңбектің үлгісі. Зілзаладағы медицинаға келсек, ол жерде тым шиеленіскен жағдайда жедел шешім қабылдау қажет. Өйткені, әр минут өлшеулі. 8 наурыз Халықаралық әйелдер мерекесі қарсаңында азаматтық қорғау органдарында еңбек ететін нәзік жандылар жайында айтамыз.
РКС: Медбике құтқарушы Дәмегүл Шәшкенова өз өмірін адамдарды құтқаруға арнап келе жатқан Балалық шағынан медбике болуды армандаған. Сондықтан шұғыл медицина саласын таңдаған. Жедел жәрдем қызметінде фельдшер болып еңбек етті. Ал 2015 жылдан бері Көкшетаудағы жедел-құтқару жасағында қызметте.
СНХ: ДӘМЕГҮЛ ШӘШКЕНОВА, КӨКШЕТАУ ҚАЛАСЫ ЖЕДЕЛ-ҚҰТҚАРУ ЖАСАҒЫНЫҢ МЕДБИКЕ-ҚҰТҚАРУШЫ: Бізде жұмысқа келгенде, 112-ден вызовтар түседі. Оған біз спасательдармен бірге мен медбике-құтқарушы болып шағамын. Әртүрлі жағдайлар болады. Сонда менің атқаратын жұмысым – зардап шеккен адамдарга көмек беремін. Әйел адамдар, ер адамдар – давление көтеріп кетеді. Әртүрлі жарақаттар алуы мүмкін. Соған мен медициналық көмек көрсетемін. Осы құтқарушы-медбике мамандығын өзім таңдадым. Өзіме қатты ұнайды.
РКС: Дәмегүл Шәшкенова қызмет бабында түрлі қиындықтарға тап болғанын есіне алды. Ол тұста біліммен қатар қайсарлық қажет,-дейді ол. Әріптестері де оның еңбегін жоғары бағалайды.
СНХ: ҒАНИ ҚҰСАЙЫНОВ, КӨКШЕТАУ ҚАЛАСЫ ЖЕДЕЛ-ҚҰТҚАРУ ЖАСАҒЫ ҚҰТҚАРУ БӨЛІМШЕСІНІҢ БАСТЫҒЫ: Дәмегүлмен жұмыс істеп келе жатқанымызға бірнеше жылдың жүзі болды. Медбике-құтқарушы ретінде біздің қатарымызда. Зардап шеккендерге алғашқы медициналық көмекті қалай көрсету керек екенін бізге үйретеді. Кезекші ауысымның құрамында түрлі сипатта орын алған оқиға орнына бірге шығады. Өз ісіне өте жауапты маман ретінде өзін көрсете білді. Жанындағылардан да соны талап етеді. Осы сәтті пайдаланып, Дәмегүлді келе жатқан мерекемен құттықтаймын. Адамға ең керегі денсаулық, отбасының амандығы, жұмысының табысты болуы. Дәмегүлге мен соны тілер едім. Әрине көктемгі жаймашуақ көңіл тілеймін.
РКС:Айта кетейік, облыстық төтенше жағдайлар жөніндегі департаментінде 100-ге тарта нәзік жанды еңбек етеді. Олардың қатарын Мәлік Ғабдуллин атындағы азаматтық қорғау академиясының курсант бұрымдылары да толықтыруға дайын. Қостанайлық Инна Чернышова 10-шы сыныпта оқып жүргенде-ақ осы оқу орнына түсуді армандапты.
СНХ: ИННА ЧЕРНЫШОВА, М.ҒАБДУЛЛИН АТЫНДАҒЫ АЗАМАТТЫҚ ҚОРҒАУ АКАДЕМИЯСЫНЫҢ КУРСАНТЫ: Қыздарды қабылдайды дегенді естіген бетте өмірімді осы мамандықпен байланыстырам деп шештім. Әрине бастапқыда қобалжу болды, жасырмаймын, қолымнан келе ме, келмей ме деп. Ұлдармен бірдей нормативтерді тапсырдық, солармен теңдей дәрігерлік әскери комиссиядан өттік. Бұл оқу орнына түсу-зор мақтаныш.
РКС: Кәсіби құтқарушыларды дайындайтын еліміздегі жалғыз оқу орнында қазір болашақ 8 офицер қыз білім алып жатыр. Олар «Өрт қауіпсіздігі» мамандығын таңдаған. Төрт жылдан соң лейтенант шенін алып шығады.
ТОҒЖАН БАЙМЕНОВА, ЭЛЬМИРА ОСПАНОВА, МЕДЕТ ҚАЙЫРКЕНОВ, ЖАМБЫЛ БАЛТАЕВ, КӨКШЕ АҚПАРАТ.