Бурабай баурайында «Altyn fest Burabay» күзгі фестивалі өтті. Шараға облыстың және өзге де өңірлердің туристік сала өкілдері мен бау-бақша өсірушілер, қолөнер шеберлері қатысты. Жәрмеңкеде жергілікті тұрғындарға көкөніс, жеміс-жидек, бал, саңырауқұлақтан жасалған түрлі өнімдер ұсынылды.
Таңертеңнен басталған күзгі жәрмеңке алаңы тұрғындарға лық толды. Азық-түлік пен қолөнер бұйымдарына арнап тігілген шатырлар тұтынушылардан босамады. Көптеген шеберлер, табиғи материалдармен жұмыс істейтін қолөнер шеберлері қонақтарды өзінің бірегей өнімдерімен таң қалдырды.
ЕРЛАН МҰРАТОВ, ОБЛЫСТЫҚ ТУРИЗМ БАСҚАРМАСЫНЫҢ ЖЕТЕКШІСІ
Барлық фестиваль қатысушылары мен қонақтарды көргенімізге қуаныштымыз. Қош келдіңіздер! Бүгінгі шарада облыс және аудан қатысушыларынан бөлек, Қостанай, Қарағанды, Солтүстік Қазақстан өңірлерінен де қатысушылар келіп отыр. «Алтын фест Бурабай» фестивалін өткізуді дәстүрге енгізбек ойымыз бар. Және өткізілу аясын кеңейтіп, қатысушыларды көптеп шақыратын боламыз.
Бурабай қалашығындағы арзан бағадағы жәрмеңке жыл сайын дәстүрлі түрде ұйымдастырылып келеді. Жәрмеңкеге қатысуға ниет білдіруші жандардың қатары да жыл санап артуда. Себебі, бұл жерде қатысушылардың өзара тәжірибе мен пікір алмасуына мүмкіндік мол.
ГҮЛДАНА БЕКТҰРҒАНОВА, ФЕСТИВАЛЬ ҚАТЫСУШЫСЫ (ЗЕРЕНДІ АУДАНЫ)
Зеренді ауданынан арнайы келдік. Осындай көрмеге алғаш қатысуым. Бүгінгі фестивальге өзімнің қолөнер бұйымдарымды ала келдім. Бұл фестивальдің берері мол деп есептеймін. Өйткені, дәл осындай көрмелер арқылы халық бір-бірін жақсырақ тани түседі. Өздеріне қажетті бұйымдарды сатып алады.
Фестиваль қонақтарының арасында Қарағанды, Қостанай, Маңғыстау, Павлодар, Солтүстік Қазақстан және Нұр-Сұлтан, Алматы, Көкшетау қалаларынан келген туроператорлар бар. Олар фестивальден бөлек, алдағы қысқы маусым мен маусымаралық кезеңде демалысты ілгерілетуге арналған инфотур мен (В2В) битуби кездесуге қатысты. Нәтижесінде, «Visit Aqmola» туристік ақпараттық орталығы өзге өңірлерден келген туроператорлармен меморандумға қол қойды.
АЙЖАН АҚТАЕВА, ДАРХАН САҒЫН «КӨКШЕ-АҚПАРАТ»