ДИКТОР: Былтыр амбулаториялық дәрі-дәрмекпен қамтамасыз ету аясында 150 мыңнан аса азамат тегін дәрі алды. Өңірде денсаулық сақтау жүйесін жақсарту бойынша белсенді жұмыстар жүргізілуде. Халықты дәрілік препараттармен қамтамасыз етуге, скринингтер жүргізуге және ауыл медицинасын жаңғыртуға ерекше көңіл бөлінуде.
РКС: Өңір тұрғындары тегін дәрі-дәрмектерді 101 дәріхана пунктінен тұратын 28 медициналық ұйымнан ала алады. Оның 15-і Көкшетау, Степногорск және Қосшы қалаларында, 86-сы ауылдық жерлерде орналасқан. Сонымен қатар, 242 ауылдық медициналық нысанда дәрі-дәрмектерді алады.
СНХ: САЯТ ТОЛЫҚБАЕВ ОБЛЫСТЫҚ ДЕНСАУЛЫҚ САҚТАУ БАСҚАРМАСЫ БАСШЫСЫНЫҢ МІНДЕТІН АТҚАРУШЫ: 102 ауру нозологиясы бойынша 157 мың адам дәрі-дәрмекпен қамтамасыз етілген. Бұған бөлінген қаражат – 10,8 млрд. теңге. Бұл көрсеткіш былтырмен салыстырғанда 8 процентке артық. 8 қаңтарға дейін азаматтар екі айлық дәрі-дәрмекпен қамтамасыз етілді. Жыл соңына дейін 12 млрд. теңгеге препараттар жеткізіледі.
РКС: 30 бен 70 жас аралығындағы ерлер мен әйелдер сегіз түрлі ауруға, соның ішінде жүрек-қан тамырлары патологиясына, онкологияға және қант диабетіне скринингтік тексеруден өтуі керек. Балалар патологиясының алдын алуға ерекше көңіл бөлінуде. Көпсалалы облыстық ауруханада жүктіліктің ерте кезеңінде патологияны анықтауға арналған скринингтік аппарат бар. Онда диагностика нәтижелерін небәрі 30 минутта алуға болады.
СНХ: РАЙХАН ҒАЛИЕВА ОБЛЫСТЫҚ ПЕРИНАТАЛДЫҚ ОРТАЛЫҚТЫҢ ЗЕРТХАНАШЫ-ДӘРІГЕРІ: Перинаталдық скрининг дегеніміз - жүкті әйелдердегі патологияның дамуын тексеру. Даун, Патау және Эдвадс синдромы бойынша тексеріс жүреді. Ауруды анықтауды кешіктірсе, баланың ақыл-ойы жетілмей қалуы мүмкін.
РКС: «Ауыл-аймақтардағы денсаулық сақтауды жаңғырту» ұлттық жобасы аясында 2024 жылы облыста 28 жаңа медициналық мекеме салынды. Биыл тағы 10 нысанды пайдалануға беру жоспарымызда бар. 3 млрд. теңгеге 111 бірлік жаңа жабдық сатып алынған. Бұл пациенттерді диагностикалау мен емдеу сапасын едәуір арттыруға мүмкіндік береді.
БЕЙБАРЫС ШАЛАБАЕВ, ЭДУАРД ПОГРЕБИЦКИЙ, ВАСИЛИЙ ВЕРЕЖНИКОВ, КӨКШЕ АҚПАРАТ